Patrick Cutrone i dha “Djallit” në San Siro fitoren në sekondat e fundit pas asissit të Gonzalo Higuain. E pavarësisht tre pikëve të marra me meritë, Gennaro Gattuso shprehet se Milani i tij mund të bëjë akoma edhe më mirë.
“Është ndeshja e dytë dhe tashmë njerëzit po më pyesin nëse është një pikë kthese. Kishim shumë keqardhje për disfatën ndaj Napolit, kemi luajtur edhe më mirë në 45 minutat e para sonte. Ka katër apo pesë ekipe që janë forcuar këtë sezon dhe ne jemi një prej tyre, por nuk mund të flas për një pikë kthese pas dy ndeshjeve të para. Unë e di se si punojnë djemtë tanë dhe se ne ende kemi nevojë të bëhemi një ekip në disa aspekte. Ne nuk mund të mendojmë se ne do të kontrollojmë çdo lojë kundër çdo kundërshtari. Ne duhet të luajmë topin dhe kjo është thelbësore”, ka deklaruar pas ndeshjes Gattuso.
Mbrëmjen e kaluar në tribunë ishte Kaka me drejtorët e rinj Leonardo dhe Paolo Maldini në një “San Siro” të mbushur, të cilët dikur vraponin në fushë bashkë me Gattuson duke i dhuruar Milanit triumfe të shumtë. “Është e drejtë vetëm që ka entuziazëm për ata që kanë shkruar historinë e Milanit, por nuk duhet të mendojmë se skuadra e tanishme duhet t’i japë fund gjithë kësaj. Ne duhet të gjejmë motivimin tonë nga vetja, në fushën e stërvitjes çdo ditë. Ne mund të luajmë me futboll të mirë këtë vit, të punojmë me qetësi më të madhe se sezoni i kaluar dhe të bëjmë gjëra të mira”.
Higuain ishte vendimtar me asistin për Cutrone – “Higuain është një nga çelësat që fshihet pas pasimeve tona, pasi ai luan një rol shumë të rëndësishëm. Në këtë moment, Patrick është një lojtar që ne të gjithë e duam, ai nuk ka shumë hapësirë tani, por së shpejti do të luajmë çdo tre ose katër ditë dhe do të ketë vend për të gjithë”.