Piloti spanjoll Marc Marquez fitoi sot garën e Çmimit të Madh të Gjermanisë në Moto GP zhvilluar në pistën e Sachsenring, duke korrur suksesin e pestë sezonal (e dhjeta në karrierë në këtë pistë).
Kampioni i botës e nisi garën nga “pole” dhe e përfundoi atë i pari, duke mos e vënë për asnjë moment në diskutim fitoren.
Madje Marquez u shkëput deri në 6 sekonda nga rivalët, duke bërë një garë më vete. Në vendin e dytë u rendit një tjetër spanjoll, Maverick Vinales me Yamaha, ndërsa i treti u klasifikua britaniku Cal Crutchlow me Honda LCR.
The perfect 1⃣0⃣ is complete! ?@marcmarquez93 completes a decade of dominance at the Sachsenring! ?#GermanGP ?? pic.twitter.com/QfLfrjK1FF
— MotoGP™ ?? (@MotoGP) July 7, 2019
Gara ishte një formalitet për Marquez, që vetëm në 3-4 xhirot e para hasi disi rezistencë nga rivalët e më pas nisi të shkëputet, duke mbyllur shumë shpejt gjithçka. Beteja më e madhe ishte për një vend në podium, ku dueluan Vinales, Crutchlow e Rins (ky i fundit u rrëzua).
Zhgënjeu sërish Valentino Rossi me Yamaha, që u rendit i teti, 18 sekonda pas Marquez, duke mos dueluar asnjëherë mes më të mirëve. Disi më mirë u paraqit Andrea Dovizioso me Ducati, i pesti, pas shokut të tij të skuadrës Danilo Petrucci (i katërti).
Në këtë garë mungoi spanjolli Jorge Lorenzo me Hondën tjetër, i dëmtuar një javë më parë (u zëvendësua nga Bradl, sot i dhjeti). Për sa i përket renditjes së përgjithshme të Moto GP, Marquez shkëputet edhe më shumë nga rivalët, teksa tani ka 58 pikë avantazh ndaj Dovizioso, që ndodhet i dyti.