Loris Karius mund të jetë i pasigurtë për të ardhmen e tij afatgjatë te Liverpool, por besnikët e “Reds” janë 100% të dhënë pas portierit të tyre. Gjermani nuk ka kaluar aspak një periudhë të mirë, kur ka qenë në qendër të kritikave e megjithatë diçka është e sigurt: që tifozët e duan dhe e mbështesin. Një gjë e tillë u vu re në ndeshjen e fundit të parasezonit kundër Torinos, kur ai u fut në lojë në minutën e 72-të.
Hyrja e tij në fushën e blertë u shoqërua me duartrokitje të shumta nga tifozët, por gjithashtu edhe me një përqafim të ngrohtë nga kolegu, Alisson. Ndonëse ky i fundit i ka “marrë” vendin e titullarit në skuadër, ish-portieri i Romës tregoi klasin e tij, duke refuzuar që të marrë fanellën me numrin 1, në respekt të Karius, i cili po përjeton momente të vështira në karrierë.
25-vjeçari ka qenë një lojtar i rëndësishëm për klubin anglez, por për shkak të disa gabimeve, si ato në finalen e “Champions League”, që i kushtuan edhe trofeun skuadrës, drejtuesit e klubit e humbën besimin tek ai, duke bërë që të nënshkruanin kontratë me një tjetër portier për një shifër rekord.