Radja Nianggolan do të luajë sot derbin e tij të parë në “San Siro” si lojtar i Interit, ndeshje që sipas tij është e veçantë. I ardhur këtë verë te skuadra zikaltër nga Roma, mesfushori belg rrëfehet se për të kjo aventurë e re është e rëndësishme, pasi i jep mundësinë të jetë më kompetitiv si në Serinë A ashtu dhe në Europë. “E shkuara ime ka qenë e vështirë, pasi kam ikur nga Belgjika kur isha 16 vjeç, ndaj dua që fëmijët e mi të mos vuajnë ashtu si unë”, tha Nainggolan.
“Unë kam bërë shumë gola, mjaft prej të cilëve të bukur dhe një të tillë dua ta shënoj edhe në derbi. Sot u them të rinjve që të luajnë me mendjen e qetë, pasi është kjo që bën diferencën në fushë”, u shpreh më tej mesfushori belg.
Më tej, Nainggolan shton: “Për mua transferimi tek Interi ishte i rëndësishëm. Më pëlqen të luaj në “San Siro”, është diçka tërheqëse, e bukur, emocionuese, mahnitëse. E ndjen mbështetjen e tifozëve si në pak stadiume të tjera në Europë”, tha belgu, që rrëfen se Ronaldo fenomeni mbetet lojtari që i ka pëlqyer më shumë: “E shihja me admirim, pasi gjithnjë arrinte të krijonte magji me lojën e tij”.