Sulmuesi spanjoll, Alvaro Morata është lojtari më i ri i Atletico Madridit.
Klubi spanjoll ka njoftuar zyrtarisht arritjen e marrëveshjes me Chelsean për huazimin e sulmuesit Morata.
“Atletico Madrid ka arritur marrëveshje me Chelsean për huazimin e 26-vjeçarit për pjesën e mbetur të këtij sezoni dhe për sezonin e ardhshëm”.
“Sulmuesi ka nënshkruar kontratë pas kalimit të testeve mjekësore gjatë të dielës”, thuhet në njoftimin e klubit spanjoll.
Ndryshe, ky është një rikthim për Moratan te Atletico, pasi spanjolli është lojtar që ka kaluar kohë në ekipet e moshave.
Te Atletico besojnë se e kanë gjetur profilin e duhur të golashënuesit, pasi sipas tyre këtë e ka treguar në shumë liga evropiane.
Morata ka luajtur në La Liga me Real Madridin, në Ligën Premier me Chelsean dhe në Serie A me Juventusin, ku në total ka shënuar 82 gola dhe 37 asistime me këto klube.
26-vjeçari gjithashtu është një reprezentues i rregullt i Kombëtares së Spanjës, ku ka 27 paraqitje dhe 13 gola.