Barcelona ka mposhtur 3-0 Liverpool në raundin e parë të gjysmëfinales së Champions League që është zhvilluar në Camp Nou.
Katalanasit kanë treguar edhe njëherë eksperiencën e madhe që kanë në sfida të rëndësishme si kjo dhe mbase nuk ka qenë skuadra më e mirë në fushë përgjatë 90’ minutave, por ka ditur të shfrytëzojë mundësitë e saj.
Sfida nisi me një temp të lartë dhe me raste nga të dy anët, por ishte Luis Suarez ai që zhbllokoi rezultatin në minutën e 27’ të takimit.
Ky ishte goli i parë i shënuar nga uruguaiani këtë sezon të Champions League dhe pikërisht ndaj ish-ekipit të tij.
Pas golit Barça e dominoi lojën deri në fërshëllimën që lejoi lojtarët të rikthehen në dhomat e zhveshjes.
Pas pushimit ishte Liverpool ekipi që iu afrua më shumë golit duke ushtruar presion ndaj katalanasve, por një kundërsulm i vendasve i dha golin e dytë.
Leo Messi shënoi pasi topi u përplas me shtyllën në minutën e 75’ dhe shtatë minuta më vonë shënoi magjinë e radhës nga goditja e dënimit.
Salah mund të kishte ngushtuar diferencën me një gol të rëndësishëm jashtë fushe, por tentativa e tij u ndal nga shtylla.
Një fitore e madhe për Barça-n që do të ketë një avantazh të rëndësishëm për ndeshjen e kthimit në Anfield.