Blerja e tretë e skuadrës së Manchester United mund të vijë nga Portugalia. Ai është mesfushori Bruno Fernandes, që luan me skuadrën e Sporting.
Ofertat për mesfushorin 24-vjeçar, që sezonin e fundit realizoi 31 gola në 50 ndeshje, nuk mungojnë (kërkohet edhe nga Manchester City, Tottenham, Roma e Inter). Gjithsesi, duket se “djajtë” janë në “pole position” për të siguruar shërbimet e lojtarit.
Për këtë arsye, menaxheri i lojtarit ka shkuar sot në Manchester për të biseduar me drejtuesit e United dhe trajnerin Solskjaer. Qëllimi është gjetja e një marrëveshje për këtë transferim dhe konkretizimin e tij të shpejtë.
Sipas “Sky Sports”, skuadra e Sporting kërkon 60 milionë euro për mesfushorin, një shumë e pranueshme, ndaj marrëveshja mund të arrihet shpejt me Manchester United. Lojtari do të ishte zëvendësuesi ideal i Pogba në rast se francezi largohet.