Ditën e djeshme u zhvillua ndeshja midis Interit dhe Breshas, në fushën e këtyre të fundit, sfidë e cila u mbyll me fitoren 2-1 të zikaltërve.
Një ndeshje kundër ish-skuadrës së tij për Balotelin, i cili në 2010 ishte pjesë e Interit. Megjithatë marrëdhëniet e sulmuesit italian me tifozët zikaltër nuk ishin aspak të mira, kjo edhe për shkak të episodeve që ndodhën me lojtarin para largimit nga Interi.
Ditën e djeshme 29-vjeçari tentoi shumë herë të shënonte, ku sigurisht do të festonte, por ishte Handanoviç i cili i mohoi golin disa herë. Pikërisht mos shënimi i një goli e irritoi shumë lojtarin, i cili për këtë reagoi keq edhe ndaj tifozëve të Interit.
Gjatë gjithë ndeshjes tifozët zikaltër e fishkëllyen pa pushim futbollistin, i cili në një rast nuk duroi dhe reagoi ndaj tyre.
Në një foto që po qarkullon në rrjetet sociale, shihet Mario Baloteli, i cili iu drejtohet tifozëve zikaltër, duke iu treguar gishtin e mesit.
Menjëherë kjo ka filluar të diskutohet shumë në Itali, dhe për këtë futbollisti tani rrezikon edhe një dënim.