Përfaqësuesja e Kosovës pritet të rreshtohet pa shumë befasi ndaj Çekisë në takimin e vlefshëm për eliminatoret e Euro 2020.
Dardanët kanë udhëtuar drejt Çekisë, ku do të përballen me kombëtaren e këtij vendi në kuadër të ndeshjeve të vlefshme për Grupin A.
Trajneri Bernard Challandes do të ketë disa mungesa të rëndësishme si ajo e Hekuran Kryeziut, Herolind Shala, Arbër Zeneli dhe së fundmi edhe Vedat Muriqi.
Megjithatë, kjo nuk pritet të ndikojë në skemat e trajnerit, pasi zvicerani pritet të paraqitet ndaj Çekisë me rreshtimin e njëjtë, 4-2-3-1.
Në portë do të vazhdoj të mbetet Arijanet Muriqi, qendra do të mbulohet nga dyshja Amir Rrahmani-Fidan Aliti, ndërsa krahët me Mërgim Vojvodën dhe Benjamin Kolollin, që shihet si favorit para Leart Paqaradës.
Në mesfushë, dyshja pritet të formohet nga Besar Halimi dhe Anel Rashkaj, i cili thuhet se ka fituar balotazhin ndaj Idriz Vocës, ndërsa treshja pas sulmuesit kryesor pritet të përbëhet nga: Florent Hadergjonaj, Valon Berisha dhe Bersant Celina.