Robin Gosens është një nga shumë futbollistët që ka spikatur këtë sezon me fanellën e Atalantës, teksa në 37 ndeshje të zhvilluara mes kampionatit, kupës dhe Ligës së Kampionëve, ka arritur të shënojë 10 gola dhe të japë disa asiste.
Futbollisti 26-vjeçar ka tërhequr vëmendjen e shumë klubeve, ndërsa mediat gjermane raportojnë se favorit për të marrë shërbimet e tij është Interi, pasi Antonio Conte e sheh si lojtarin ideal për krahun e majtë të mesfushës.
Në të djathtën zikaltrit investuan për Achraf Hakimin, i cili do të ketë si rezervë të parë italianin Antonio Candreva, ndërsa në të majtë është konfirmuar anglezi Ashley Young dhe po kërkohet një emër i ri që të bëjë rolin e titullarit.
Robin Gosens luan prej 3 sezonesh në kampionatin italian dhe ka fituar pjekurinë e duhur tashmë, ndërsa një tjetër aspekt në favor të tij është se gjatë gjithë kohës ka luajtur si mesfushor i majtë në skemën 3-5-2, të njëjtën që aplikon edhe Conte te Interi.
Për kartonin e tij Atalanta kërkon rreth 30 milionë euro, por marrëdhëniet e zikaltërve me bergamaskët janë mjaft të mira dhe gjasat janë që marrëveshja të arrihet për shumë më pak dhe ndoshta të përfshihet edhe huazimi i ndonjë futbollisti të ri.